Whoopee! Hurray! Ah done! Ah Submit! People ...ah Turnitin!!

Whoopee! Hurray! Ah done! Ah Submit! People ...ah Turnitin!!
Mih essay ah mean and now ah smilin’
Ah doh kno’ if you like me ....type, type, type ...look at Word count
Buh wha the jail is dis only 375 words? An’ ah typing sooooo longggg?
Type type type... nah ah not lookin’ again. Dat counter cyar count!

Ah cut an paste here and ah cut an paste dere...no ah not plagiarising!!
Remember Turnitin go be checkin
An me eh want nobody tink I thiefin
So what ah really cutting an pastin’ was pieces from my own first draft
Dat is how I does write essay you kno
Ah does write mih thought down
From day one

Mih head buckin buh ah still typin
Ah seein in double...whey dis is trouble
Today is de 27th no ah not remembering 1990
Ah remembering dat the 30th is only 3 days away

Take ah look nah girl! You kno how long you typin
I sure you nearly finish...look how you fingers lookin
Take ah look! Take ah look!
Whaaaa... Helloo?
What do you mean? This cannot be happening to me?
People ah pass the 2500 mark...so you know wha dat mean?
Ah go have to turn back, take out, throw out.
You see, you see
I told you to take a look a long time ago
But nah you fraid to ...so guess wha it dX#@ good for you
Steups! Steups! Steups!

Ah chop chop here and ah chop chop dere
Here is good an there is good.
Hell everywhere lookin good good
Yeah ...yeah
You remember the beginning of dis poem?

Whoopee! Hurray! Ah done! Ah Submit! People ...ah Turnitin!!